Ons Gemeente

Ons Gemeente is amptelik op 8 Junie 1952 gestig. Die Kerkgebou is op 30 Julie 1955 ingewy.

Die Gemeente bestaan uit ouderlinge wat moet onderrig en lei, asook diakens wat daar is om te dien. Lidmate dien onder die toesig van hierdie leiers en onder die gesag van Jesus Christus wat die Hoof is van Sy Kerk.

Teologie van ons Gemeente

Teologies streef ons daarna om Christelik-Evangelies te wees. Ons is nie Gereformeerd Calvinisties of PinksterCharismaties nie. Ten opsigte van Bybelse lering is ons nie leerstelling van aard nie. Ons wil net die Goeie Nuus van Jesus Christus verkondig.

Ons onderskryf die Bybelse leer van die Drie-Eenheid: Vader, Seun en Heilige Gees. Ons glo dat Jesus self ook God is en dat Hy ‘n volmaakte verlossing bewerk het. Hy is die Weg, die Waarheid en die Lewe en niemand gaan na die Vader behalwe deur Hom nie. Ons glo dat al 66 boeke van die Bybel, die Woord van God is. Ons glo dat die Kerk uit gelowiges bestaan. Geloof in Hom en bekering tot Hom is belangrik.

Ons wil graag al ons lidmate tot geloofsekerheid lei en hulle help om geestelik te groei. Ons glo dat die Doop en die Nagmaal slegs aan gelowiges bedien mag word. Ons glo dus aan die Doop van gelowiges na bekering.

Dit is ons Gemeente se doelwit:

• Om buitestanders in te trek deur Evangelieverkondiging.
• Om hulle in kontak te bring met ander Christene
• Om hulle te help groei in hulle geloof
• Om hulle uit te daag om hul bediening te ontdek (betrokkenheid)
• Om hulle te leer om die Here te eer met hul lewens (aanbidding)